Cod. 8960 - 126r-126v

Aus Prag von 10. Aprill
   1] Auf 6. dis umb 12 uhren nachmittags seindt der Röm(isch) Kay(serlichen) Ma(jestä)t gesandte, namlich graf Albrecht von Fürstenberg und herr Jacob Kurtz zue baiden churfürsten Sachsen und Brandenburg als auch andern fürsten zue rhaisen abgeförtiget, die auch deßelbigen tags alsbaldt verruckht, die haben under andern bevelch, ainen reichstag zue solicitieren, aintweder nach Speir, Regenspurg oder Nurnberg anzustellen.
   2] Sonst will unser hiesiges verruckhen (der gewisen zeit halben) noch nit lauttbar sein, jedoch haben Ir Kay(serliche) Ma(jestä)t etc. dem hof camer presidenten herren Hofman bevelch geben, baiden quartieren alls den hätschieren und trabanten auf die verschine feirtag jedem zwen monat soldt raichen zue laßen, dem er Hofman aber nit nachkhommen, sondern am hailligen oster abent nit mehr alls ainen monat soldt inen volgen lassen, deßen sye sich höchlich beclagt, als nhun solliches Irer Kay(serlichen) Ma(jestä)t etc. fürkhommen und daz mehr gedachter herr Hofman von disem ain ligendts guet per 150m thaller erkaufft und der hinderhaltung ainen monat soldt, namlich 60.000 thaller (in abschlag seines erkaufften guets abzuerichten), allberaith auf die gutschy geladen und darmit darvonfahren wellen, haben Ir Kay(serliche) Ma(jestä)t alsbaldt zuem herren Hofman geschickh, sein tuen einzuestellen und den andern monat soldt beeden quartieren auch zuerstatten, wie dan beschechen, d as khombt vil gedachtem herren Hofman, auch andern inn ämptern, zue nicht geringem nachthaill und verdacht.