Cod. 8960 - 13r-13v

Auß Prag vonn 9. Jenner
   1] Der pollnische khönig Batory ist gewißlich gestorben, also practicieren die pollen umb ainen andern khönig, und obwollen die vermuetung starckh ist, es mechte der printz vonn Schweden nachent hinzu khommen, darumben, daz er vom pollnischen khöniglichen geblüet, so judicieren doch andere, sie, die pollen, werden ainen auß irem mittell zum khönig erwöhlen.
   2] Die Röm(isch) Kay(serliche) Ma(jestä)t etc. noch derselben gebrüedere werden sich umb diese cron nit bewerben, da aber vonn den pollnischen ständen proprio motu deßwegen ain anlangen geschechen, würde man vill nicht vonn sachen heren reden, unnd dartber mit allem vleiß consultieren.
   3] Der khönig vonn Franckhreich (als der die entpfrembte pollnische cron noch inn seinen hannden hat), wirdet jeglichem der dignitet eines neuen khönigs inn Pollen vergohnnen.
   4] Es ist ain unversechens geschray an unserm hoff außkhomen, als sollten Ir Kay(serliche) Ma(jestä)t etc. inn kurtz vonn hinnen mit allem hoffgesündt nach Preßlau inn die Schlesinn verraysen, ob solliches nun mit grundt volgen, wirdet man baldt vernemmen.
   5] Vill mehr will für gewiß gehalten werden, hochstgedachte Kay(serliche) Ma(jestä)t mechten sich baldt nach dem faßnacht uff Wien volgents inn Ungern gehn Preßburg begeben unnd nachmals ainen reichstag bedacht sein zuhalten.
   6] Auf 19. diß seindt wir deß churfürsten zue Sachsen allher gewärtig, die ursach mag sich als dann eröffnen.
   7] Der F(ürstliche) Durch(lauch)t ertzhertzog Ernsten hat man vergangne woche zu Wien (als Ir Durch[lauch]t auß der kürchen gangen) deß jungst nidergelegten türggischen chiausen köpff uff ainem seidin thuech presentiert unnd darneben 4 türggen, 3 eroberte fanen unnd andere sachen mehr.