Cod. 8960 - 358r-359v

Auß Prag vonn primo September
   1] Vor dreyen tagen ist ein vorlauf der election eines pollnischen khönigs allhero khommen, darauf der herr nunctius an disem hoff alsbaldt ainen aignen currier nach Rom gefertiget, weill aber die zeitung damalen bey uns noch inn etwaz zweifell unnd ungewißhait gestanden, auch nit allerdings annemlich zu hoern geweßt, darumb daz den 20ten passato drey nominiert unnd proclamiert sein worden, als namlich der schwed vonn deß cantzlers unnd seiner faction partey, die littauer den moscovitter, etliche wenige aber ertzh(erzog) Maximiliano etc. ir stimb geben, unnd doch letstlich auf den schweden geschloßen worden, darauf dann die khönigin den Sborofsky unnd irer faction laßen anzaigen, daz sie sich nun mehr solten zu rhue begeben unnd inen die wahl also laßen gefallen, darwider haben sich doch die Sborofsky unnd ir parthey starckh gesetzt unnd dise wahl durchauß widersprochen, die khönigin gebeten, daz sie sich der wahl weiters nichts wolte annemmen, sonder sie auch gewarnet, sie solte nit ursach sein, daz der schwedt inns lanndt khomme, dann sie wurden ime mit aller marcht widerstanndt thuen unnd entgegen ziechen, dieweill auch dise wahl außer deß aufgerichten conclave an ainem ungewonlichen orth geschechen, hat man sich demselben umb sovill desto mehr widersetzt, haben deßwegen die Sborofsky unnd ir faction so baldt die sachen gar starckh mit allem gewalt unnd höchstem ernst getriben, daz namlich vonn neuem ein session an dem gebürlichen orth zusamen gebracht, mitler zeit auch die littauer von irem vorigen voto gewendet unnd auf der Sborofsky gebracht.
   2] Als man nun lanng inn gehaltner session (nemlliche biß auf 5 uhren inn die nacht gewöhret) vonn der election aines unnd anders tractiert, ist entlich inn sollicher session mit aller ainhelligkhait ertzherzog Maximilianuß allain unnd sonnst khainer nominiert unnd proclamiert worden, unnder wellichem actu sich die moscovitterische bottschafft gantz dienstlich unnd zu disem werckh ersprüeßlich fürtreffenlich wol erzaigt, dann sie hat außtruckhenlich vermeldet, da ir herr zu diser khöniglichen dignitet nit khönte khommen, so wüßte sie woll, habe auch inn bevelch, daz seinem herren dem moscovitter khain angenemerer zum khönig inn Pollen khönde erwöhlet werden als ainer auß dem hauß Österreich, deßen ain ewiger freundt er sein unnd wider alle der Pollen feindt zugleich für ain mann stehn welle, wann auch inn disem actu deß schweden gedacht worden, hat gemelte pottschafft den säbell gezuckht unnd den senatoren zuverstehn geben, daz sein herr nit werde gestatten, daz der schwed inns lannd khomme oder aber, da er darein khemme, vonn nun an deßen abgesagter feindt sein welle, damit hat die wahl den 22. Augusti umb 9 uhrn inn der nacht ir entschafft glückhlich erraicht, unnd ist noch dieselbige nacht daz conclave eingerißen worden zueverhüetung ainicher weiterung.
Dise zeitung ist auf 25. Augusti vor tags von den kayserlichen gesanten auß Warschau mit aignem currier allher khommen, unnd dieweill dieselb nun mehr gewiß, hab ich zu gueter frölicher pottschafft auch berichten sollen. Gott der Allmechtig verlaiche weiter, waz zu disem werckh allgemainer cristenhait nutzlich unnd guet ist.
   3] Allhie nimbt man knecht an, gibt fl leuffgellt nach Wien, unnd sollen zu Wien auch 3000 knecht angenommen werden, deßgleichen 1200 schützen, die sollen alle mit Irer Durch(lauch)t nach Pollen ziechen sampt den 2000 reüttern, so graf Sigmundt vonn Hardeckh unnd herr Melcher vonn Redern inn bestallung lanngest gehabt.
   4] So haben baide churf(ürste)n Sachsen unnd Brandenburg zwen ainspenniger allhie gehabt, die sein gestern widerumb abgefertiget worden, erbieten sich baide churf(ürste)n der Kay(serlichen) Ma(jestä)t etc oder dero gebrüeder an, 4000 reutter wolgerüst auf 3 oder 4 monat auf iren costen zuhalten, wahin man sie brauchen welle.
   5] Post scripta
Gleich jetzo sagt mir der vennedischen pottschafft secretarius für gewiß, der printz vonn Schweden ruckhe 20m starckh auf Pollen zu, der welle mit gewalt khönig inn Pollen sein.