Cod. 8961 - 123r-123v

Auß Prag vonn 24. Febrer
   1] Vom ertzhertzog Maximiliano haben wir anderst nichts, dann daz man Ir D(urchlauch)t mit 4000 mann uff daz schloß Kraßanystow (7 meill vonn Liblin inn klain Pollen gelegen) gefiert unnd daselbsten deß groß cantzlers vöttern unnd vertrauten Droyofsky, hauptman zu Prenisle, inn verwahrung bevolchen hat, ohnbewüßt, ob man Ir D(urchlauch)t inn vermeltem schloß laßen oder noch weiter inn Reißen hinein transferieren, deßen es desto weniger bedürffen wirdet, wann alle der Kay(serliche) Ma(jestä)t etc. lanndtschafften so seer zum friden als die behem instiniert seindt, die haben Ir Ma(jestä)t etc. underthenigist gebetten, daz Ir Ma(jestä)t etc. dise irrungen (zum wenigisten doch sovill die Schlesy unnd andere der cron Behem anexierte provincien belangt) zu güetlichem accordo wellen mitlen laßen, seitemal ertzh(erzog) Maximilian sich durch sein schreiben selbsten darzu genaigt erclert, auch dem cantzler kundtschafft gibt, der seye gleichsfalls gesinnet unnd habe deßwegen alle feindtlichait widerumb abgestelt.
   2] Waß nun Ir Kay(serliche) Ma(jestä)t etc. sich hieriber resolvieren wirt, thuet zeit eröffnen, jedoch zuerachten, Ir Ma(jestä)t etc. werden zuvor den ständen der cron Pollen selbst zue schreiben, auch mittlerweill antwurt vom könig Phillips auß Spannia unnd dann der andern herren vonn Österreich gemaines guet bedunckhen gleichsfalls vernemmen unnd erwarten wellen, hierzwischen laßen Ir Ma(jestä)t etc. die confini hiezue lanndt inn omnem eventum starckh besätzen.