Cod. 8961 - 786r-787r

Auß Praag von 8. Novembris
  1] Es khombt seidhero gwiß zeittung alher, daz inn Polln die pest je lenger je hefftiger einreissen thuet, also das zu Craccau und inn gegendten auf Ungern, Lamberi und Reyssen, deßgleichen auch in groß Polln deß schweden hof dermassen inficiert sey, das auch albereit vil von den hetschiern und andern fürnemmen hofleuthen sowol auch der alten königin die palatinessa favensis und andere mehr aus irem frauen zimmer durch dieselb umb khommen seindt, das also der schwed aus forcht sich inn Littau begeben wölln, die littauer aber, alß sie solches vernommen haben, ime zugeschriben, er wölle dißmal, weyll die infection an seinem hof also eingerißen, zu inen nit khommen, darneben vermeldet, ob er gleich komme, das sie ime nicht hinein lassen wolten, darumben verursacht worden, sich widerumb zuruckh gehn Nipolonitz nit weit von Craccau zu begeben, da dann die pest auch albereit eingerißen und desselben orts storessons weib und tochter mit todt hingenommen, und weilln es zu Warschau derenthalben nit sicher, so soll die königin von dannen gleichfalß gewichen sein und zu meidung solcher infection sich hin und wider inn denn umbligenden dörffern ufhalten.
   2] Diß vermeldt einer vom adel auch, das zu Ostwientin auf der cantzel gewiß sey verkhündigt worden, wie das der Lasky durch erhr gemelte infection soll ausgedilgt worden sein.
   3] Deßgleichen das sich der groß cantzler übel gehabe und zu der khönfftigen commission (so dieselb bey eingefallner gefehrlicheit wurde fürgenommen werden) zuerscheinen nit gesinnet, sonder entschlossen were, auch albereit den starossen Pizilniscky anstatt seiner deputiert hatt, wie aber andern mehr geschriben wirdt, so ist die zusamenkhonfft für dißmal gar eingestellt worden.
   4] Von der schlacht und victori, so die hungern wider die türggen erhalten, darvon ich euch jetz zumaln meldung und lestlichen die confirmation gethon, befindt sich seidthero, das dem türggen ein nachtruckhen auf 3 meil wegs vil ein mehrer abbruch und schaden geschehen, alß man vermeint hat, und wie man jetzt ausgibt, sollen die ungern und türggen gegeneinander starckh im anzug sein, die ungern dem türggen schon albereit ein statt abgewunnen, dieselben geblindert und in brandt gestökht, was nun an disem mit grundt sein wirdt, möchten die ersten brief dessen confirmation mitbringen. Gott der Herr wölle, das die christen den sig wider disen bluetdurstigen hund erhalten.