Cod. 8961 - 84v

Aus Prag vonn 9 Febrer
   1] Vonn pollnischen zeitungen haben wir derzeit laider nichts guets, miessen es Gott bevelchen und dem unglückh durch die ibelle fürsehung die schuldt geben, ist allain umb den frommen herren zuethuen, der also verfüert und zue letst zuem thaill verrathen und verkhundtschafft worden, Gott helffe ime wider zuer erledigung, damit habt verlieb, dan es will unß bey hof nit gebüern, von disen sachen vil zueschreiben, zue dem es auch verbotten worden.
   2] Inn ganz Schlesy und Märhern ist der fünffte mann auf dem landt unnd inn stätten der 10. mann aufgebotten, deßgleichen inn ober und nider Laußnitz, und demnach Ir Ma(jestä)t etc. an jezo ain landtag allhie halten, mechte man nach verrichtung deßelben vernemmen, was man mit Polln anfahen wirdet.