Cod. 8961 - 852r-852v

Aus Prag von 29. November
   1] Am nechst verschinen sambstag ist widerumb ain aigner churrier hieher khommen, der hatt zeyttung gebracht, das der graf von Serin inn Crabaten ain anzal türggen geschlagen, habe auch zwo türggische vösstungen erobert, nämblichen St. Peter unnd Schakathuren, solche mit veldtgeschütz beschossen, welliches gleichwol etwas vil wider den fridens anstandt gehanndlet.
   2] Wie man vernimbt, sollen die bassa von Ofen unnd Temerswar noch zue veldt ligen unnd zimblich starckh, unnd befinde sich der bassa von Ofen selbs personlich zue Setschen, unnd der vonn Temerswar zue Zanrasch bey Sonock, denen ziechen noch teglich volckh zue, sowol zue roß als zue fueß, ja auch von weitt gelegnen ortten khomme denen vonn griechischen Weißenburg und daselbsten gelegnen ortten auch hilff zue, also das sich annderst nichts zuversehen, als weittern einfalls inn der Kay(serlichen) M(ajestä)t etc. ditio.
   3] Obwollen die deputierten comissary zue der pollnischen tractation täglich auf die pollnischen granitzen von hinnen haben abraisen sollen, als nämblichen der duca de Sabionetto, herr vonn Rosenberg, herr von Neuhauß, ungerischer cantzler, unnd der bischoff vonn Ulemitz, so ist doch der duca de Sabionetto tödtlich krannckh worden, wie er dann am nechst verschinen sonntag communiciert hatt, also das die fürgenomne tractation sich abermals etwas verweylleen wirdet. Der liebe Gott schickhe allenthalben alles zum bössten.
   4] Wellicher gestalt der secretari Oberburger mit todt allhie abganngen, ist vor disem angezaigt, unnd ligt der secretari Erstenberger noch schwerlich krannckh.
   5] Her Bianchetus, auditor Romanae Rotae, ist am verganngnen Freitag (nach verrichter geschäfft) widerumb nach Cracau von hinnen verraiset, entzwischen am verschinen sonntag vom herren cardinal legaten ain churrier auß Pollen allhie ankhommen, wellicher vermeldet, das gedachter herr cardinal samb täglich zue der Kay(serlichen) M(ajestä)t etc. allhetkhommen werde, was er guets aus Pollen mit sich bringen, haben wir zuerwarten.
   6] Sonnsten ist der herr Nadasti unnd herr Budin mit biß inn 12.000 starckh auch widerumb außgezogen, zue Gott hoffende, wir wellen baldt zeitung bekhommen, daz sie was guets wider den erbfeindt werden verricht haben.