Cod. 8961 - 909r-909v

Auß Prag von 21. December 
   1] Neues hatt sich seider des jungsten nichts sonderlichs verlauffen, allain ist der cardinal Aldobrandinus auf 19. huius sambt seinem ganzen hoffgesindt gar woll unnd  uberflüssig content vonn hinnen widerumb unnd nach Beutten verraißet, unnd mit ime der byschoff von Ulmiz unnd herr Johann Cobenzell, unnd sollen der ungerisch byschoff unnd canzler sambt dem herren von Rosenberg an St. Steffans tag vonn hinnen hinnach volgen unnd die zuesammen khunfft primo Januari auf die pollnischen unnd schlesischen gränizen ann etlichen underschiedlichen orthen (andere sagen zue Beutten) beschechen, unnd jettliche parthey nit uber 400 pferdt starckh sein. Der Allmechtig verleihe, das dise zuesamen khunfft zue glickhlichem wunsch abgehn möge.
   2] Gedachtem cardinal haben die Kay(serliche) Ma(jestä)t etc. sehr großem favor erzaigt, dergleichen keinem legaten vor disem nit geschechen, ja Ir Ma(jestä)t etc. haben ine auf 17. diß selbs inn seinem logiament besuecht, der hatt volgenden tags am sontag höchst gedachte Ma(jestä)t etc. valediciert, dem solten Ir Ma(jestä)t etc. ain diamant kreiz vonn 6000 thaller werth verehrt haben.
   3] Verschiner tagen ist der moßcowittische dienner unnd allain allher gesantte vonn hinnen unnd wider nach der Moßcau verraißet, der hatt vermeldet, sein gros fürst welle khaines weegs den schweden inn Polln leiden, vermuetlich sy werden gegen ainander baldt daß schwerdt inn die handt nemmen.
   4] Der herr Laskhy ist zue Cracau neulicher tagen an der peste gestorben, dieselb infection haben zwen deß herren Caspar vonn Schönbergs dienstjungen in des Leskhinß logiament gebracht, durch ainen khaufften ungerischen kozen, inn wellichem logiament der gedachte vonn Schönberg auch logiert gewest, unnd vonn Leskhy ain stattliche suma gelts habe erheben sollen, welliches aber durch sollichen thodtfall dahinden gepliben, wie man fürgibt.