Cod. 8962 - 83r-83v

Auß Praag von 25. February anno 89
   1] Inn pollnischen sachen bleyben beederseidts commissary noch steuff auff ihrem begehren, wie vor disem vermeldet, jedoch haben sye den styllstanndt (so zum ennde gelauffen gewest), noch biß ult(im)o Marty prolongiert, unnd hatt die Kay(serliche) May(estä)t ihren abgeordneten bevölch gethun, sye sollen die hanndlung inn dem bäbstlichen legaten compromittieren oder wafehr solches bey den pollackhen nit verfachen wölle, sich dahin bearbaytten, ob mann noch für an acht oder zechen monath den frydtstanndt erlänngern khönnde, damit man hiezwischen eindtweders auff jetzt khönfftigen lanndttag zue Warschau oder heernacher auf andere zuesamen khonfft weytter miteinander gelegenlicher forth tractieren khönnde.
   2] Die Polln haben undereinander bey Warschau ein versamblung gehabt unnd ein starckhe anlag oder steyr wider ihre feyndt angelegt, der adel aber nichts bewilligen wöllen, allain sich erclärt, wann es zuer noth khomme, wöllen sye sich zue roß unnd fueß schon fünden lassen, sollen auch auff den groß cantzler nit wol zuefryden sein, daß er ihnen den Polln allen nachbaurn zue feynden mache.
   3] Sonnssten würdet alhie außgeben, der moscoviter habe Pollazka mit 80 taussent mann belägert, daz würde den polln nit gefallen.
   4] Von kheinem reychstag hört mann noch nichts, daß pollnische wesen hindert vil.