Cod. 8963 - 140r-140v

Auß Wien von 28. dito
   1] Vonn neuem für dißmaln nit vil sonders zueschreiben, dann das die unsern inn 12.000 zue roß und fueß starckh über den Platten See dem veindt entgegen ziehen, welcher mit inn 16.000 sambt dreyen bey sich habender beegen, so albereit im anzug, umb einen straiff herauf zuethun, möchte also ehe lang zue einem starken treffen kommen und ein bluettiges jar in disen landen abgeben.
   2] Es ist auch ein fürnehmer herr, so ein berüembter kriegsman gewesen, Balthasar Buttion genant, mit todt abgangen, welcher jar und tag uf 300 man zu roß und fueß uf seinen eignen costen im veldt gehalten, nach dessen todt ist die gannze besoldung fur dises 90 jar verordnet befunden worden, der hat inn seiner lebzeit jedem seiner kindt, deren er drey hinderlassen, 30.000 taler an barem gelt verschafft, der solle auch inn 20 herrschafften oder schlösser als sein eigenthumb inn gehabt haben, so ein gewaltiger mann und gueter religion gewesen, sein hinderlaßner son, so von 22 jarn ab, ist ins regiment kommen, welchen er uf seinem todtbeth ganz ernstlich wider den erbfeindt sich ritterlich zu halten ermahnet, auch mit gebender hand zuesagen muessen, das cristliche bluedt zeit seines lebens zue defendieren. Gott verleyhe ime glückhlichen sieg, dem vattern nachzuvolgen.