Cod. 8963 - 396r-396v

Auß Wien vom 9. dito
   1] Verschiner tagen hat sich die pollnische pottschafft (welliche hiebevor bey Irer M[ajestä]t etc. zue Prag sich erzaigt) alhie befunden, deren obrister der bischof von Cracau sein, solle auch bey Irer F(ürstlichen) D(urchlauch)t etc. audienz gehabt haben, was aber desselbigen anbringen oder werbung, ist derzeit unbewust, unnd wie man sagt, widerumb nach Rom verraist.
   2] So hat man bißhero mit schiffen und anderm (umb den tribut nach Constantinopoli zufüeren) starckh gerüstet, und daz mit dem obristen haubt (so herr Ehrnreich Streun sein würdet) über 100 personen hineinraisen, darunder vil statlicher vom adel grosse fürbitt gehabt.
An jezo vernimbt man, daz es mit der potschafft, welche gedachten tribut nach Constantinopoli füeren soll, etwas contrario und mißlich stee, daz sollicher gelifert, vil weniger der türgg denselben annemmen werde, daz causiere jüngster kampf, so dem soldano sehr übel gefallen, auch darüber (wegen verlaufs) nit wenig erzürnet, inn mainung, wie der verlaut, daz er den friden zuhallten nit mehr schuldig, welliches ein fürnemer von adel für glaubwürdig außgeben, daz derowegen inn der hofkriegscanzley vil schreibens hin und wider abgeben thuet.
   3] Sonsten lasst sichs ansehen, man alhie mit der religion was ernsts fürnemmen werde, dann alberait etliche predicanten inn der burg sambt vilen fürnemen burgern, so auch der religion seindt, gefengkhlich gehallten werden, also wenig guets darauß zuervolgen, sonder mehr zue aufruer und grosser zerrütlicheit die sachen ablauffen möchten. Gott der Herr verhüete übel und wende alles zum besten.
   4] Für dißmal anderst nichts, dann daz man diese wochen daz landvolckh alhie gemustert, die seind ains thails zimlich wol staffiert erschinen.