Erwähnte Orte
Erwähnte Personen
Titel | Funktion | Identifizierung | Erwähnungen insgesamt |
---|---|---|---|
Schweden, Johann III. von |
77
|
||
Radziwiłł, Familie |
5
|
||
Zamoyski, Jan | Amtsträger |
289
|
|
Polen und Schweden, Sigismund III. von |
448
|
||
Rudolf II. | Kaiser |
2139
|
|
Ferdinand von Tirol |
140
|
||
Baden-Durlach, Ernst Friedrich von |
38
|
Transkript
Auß Prag vom 3. July anno 90
1] Vor tagen seindt frische brief auß Cracau alher gelangt, die thun gar kein meldung von deß allten königs in Schweden jüngstlich angeregten unbesintheit und von dem proceß, den er gegen etlichen seinen räthen sollte geüebt haben.
2] Sonsten würdt von dar geschriben, daz die tartarn mit aller macht auf die pollnische grennzen im anzug waren, darauf sich der weywoda zue Brestane mit 40.000 coßaggen und anderm kriegsvolckh zue veldt begeben, gedachten tartarn gegenwör zuthuen, es solle auch der weywoda von Vilna mit den littauern obgedachtem weywoda mit erstem zue hilf nachvolgen.
3] Der pollnische großcanzler ist zue Samoskho, und ob deß pollnischen adels verwaigerungen der contributionen übel zufriden.
4] Der pöllnisch könig Sigismundus befindet sich zue Warschau, besorgt gleichwol nit, daz ine die türggen diß jar haimsuechen sollen, wann sie aber die schwirigkait, so bey dem pollnischen adel furgeet, wissenschafft bekommen, möchten sie villeicht mehr herz zue einem widerwerttigen fürnemmen fassen.
5] Nechst kommenden freytag oder sambstag, nemlich den 6. oder 7. diß, sollen der evangelischen churfürsten gesanten hieher kommen, vermuetlich wegen der herrn capitularn deß brueder hofs zue Straßburg abermals bey der Kay(serlichen) M(ajestä)t etc. zu intercedieren, zue derselbigen sachen haben freylich die Kay(serliche) M(ajestä)t etc. sequestratores verordnet die F(ürstliche) D(urchlauch)t etc. erzherzog Ferdinandum zue Össterreich und marggraf Ernst Friderichen zue Turlau, denen sollen die bemellte capitulares wie auch der gegenparthey alle (zwischen inen) strittige sachen und der eingezognen gaistlichen guetern sequestriern und volgents Irer Kay(serlichen) M(ajestä)t etc. entschaidt darüber erwartten, man will gleichwol noch sagen, die obberüerte der churfürsten gesanten kommen hieher auf der Kay(serlichen) M(ajestä)t etc. bey Iren Churf(ürstlichen) Gn(aden) beschehen ansuechen, tregt jedoch grosse bey sorg, gedachte sequestration werde kein statfinden, bevorab bey der ainen partey deß bruederhofs.