Cod. 8963 - 522r

Auß Wien von 4. Augusti 90
   1] Die F(ürstliche) D(urchlauch)t etc. erzherzog Ernst etc. sambt dero geliebten frau schwester, der königin von Franckreich wittibin, sein uf 30. p(assa)to widerumb von Grez alhie ankommen.
   2] Mit dem schloß daselbsten, und daz solliches die landtschafft eingenommen, ervolgt nit unnd alle sachen gestillt sein sollen.
   3] Den 27. obgemelts monats nachmittag umb 3 uhrn ist laider zue Preßburg an mer orten und zugleich mit einander ein feur aufgangen und dermassen ein solliche brunst ervolgt, daz gar nahent (wie von vilen warhafften leüten angezaigt) schir die ganze statt und biß etwan an ein 50 heüser abgebrunnen, und wie man sagt, soll solliches von den türggen (welliche hin und wider zubrennen bestelt und außgeschickt) eingelegt sey worden und wol zuglauben ist, dieweil die sag, es thüe der bassa von Ofen vil verhinderung, daz die potschafft (mit der järlichen verehrung nach Constantinopoli verraisen sollen) noch biß dato kein sicher glait bekommen mögen.
   4] Etliche deß rats von Breßburg seindt dieser tag alhie ankommen, und die vermuetung, werden bey Irer D(urchlauch)t etc. wie auch hiesiger stat umb zeüg, bauholz, maur-, zimmer- und werkleüt anhallten.
   5] Es ist alhie ein greüliche hiz und dürre, hat in 8 wochen überainmal nit geregnet, und wie man sagt, daz sich an etlichen ortten wälder und holz anzünden.