Cod. 8963 - 654r-654v

Auß Wienn von 16. Septembris anno 90
   1] Wie übell es heut nacht hie durch einen erbedem gehauset, kann ich dir nicht verhalten, wellicher gesteren nach mittag umb 5 uhrn seinen anfang genommen, die heusser allenthalben inn der statt dermaßen erschittet, die leuth darinn unnd anders empor gehoben, umb mitternacht aber etliche heusser gar eingeworffen, etliche personen erschlagen unnd St. Steffans, St. Michaels, zue unser frauenkirchen unnd thurn vil ziegel und grosse stuckh von sich geworffen, deßgleichen von deß keysers burg knöpf, stain, stuckh, ziegel unnd rauchfang ettliche zerspalten und abgehebt, die taach noch ufeinander kleben und stehn bliben, Gott weist, wie es noch geeth, bey mir hats die Schottenkirchen schier halb eingeworffen unnd ist eben ein grosser schröckhen under dem volckh geweeßen unnd annderst sich ansechen lassen, alß welle der jungste tag khommen.
Hatt umb vil tausent gulden schaden gethon, nach miternacht umb 2 uhren hat es wider ein erbedem gehabt, aber nit mer so schreckhlich, es sein die leüth auß den heusern uf die gassen geflohen, unnd die halbe naacht nach mitnacht allenthalben empor gangen, unnd soll ein gelertter mann (dessen namen nit benant) weißgesagt haben, es werde ein noch vill schreckhlicher erdbedem baldt heernach khommen. Gott welle sich unser gnedig erbarmen.
   2] Die besessene edle frau ist gesteren inn der Schottenkirchen von iren bösen gaisteren erlediget unnd gantz vernunfftig gemacht worden, Gott sey lob, die ist vergangne wochen, alß der priester mit ir gehandlet, ungefärlich ein stundt verzuckht und kein leben mehr an ir gespürt worden, und alß sie zue ir selbst khommen, wunderbarlich ding geredt, fürnemlich aber angefangen zue rueffen, wee, wee euch regenten von Össterreich, wee dem von Papenhaim, wee der statt Preßburg, dann sie würdt auf den grundt abgebranndt werden, statt Wienn, sie würdt zue grundt gehn. Under annderem hat sie auch gesagt, wie sie der engel Gabriell für der höllen portten gefüerth unnd ir die seelen der verdampten, auch die qual der selbigen gezeigt, unnd wie sie vill grosser herren, inn sonderheit aber Marttin Luther gesehen, der kleglich uber sein lehr unnd predigen schreye.
   3] Vergangne wochen hatt man zwen prenner, welliche Preßburg unnd St. Geörgen schir halb abgebranndt, zue St. Geörgen hingericht worden, nackhet inn ein grossen hilzen kessel gesetzt, haiß siediges öel über sie abgossen und alßbald darauf ein schöfflin mit kaltem wasser, nachmalß haiß zerlassen bäch, unnd solliches etliche mall bey einer stundt getriben, und alß sie sich schier abgeschryen unnd den gaist aufgeben wellen, daß holz ob inen und neben inen angezündt, die sollen uf ein grossen herren bekandt haben, der inen deßwegen gelt geben unnd bestelt hab, der ligt hir gefangen, sein nam ist noch nit offenbar, der soll auch ein stattliche suma gellts vom türggen empfangen haben, prenner zuebestellen.