Cod. 8963 - 668v-669r

Auß Prag von 26. dito
   1] Wellicher gestallt es mit etlichen zue Wien ervolgten erdbidem ganz erschrockenlich zugangen, werdet ir zweifels ohne von darauß vernommen haben, alhie haben sich auch zum fünfftenmal erdbidem merckhen lassen, jedoch Gott sey lob gnedig abgangen.
Sonst schreibt man, daz erdtrich hab sich an etlichen orten underhalb Wien gewaltig aufgethon, darauß sey so grosser gestanckh gangen, daz niemandt über sollichen bleiben künden.
   2] So hett sich auch zue Blau, 16 meil von hinnen ein grosse anzal fleügen mit 4 weissen flüglen erzaigt, daz sie nit allein die heuser, sondern auch die sonnen dermaßen bedeckt, daz man schwerlich darvon hat sehen könden.
   3] Hernacher seind daselbsten auf der erden kolschwarze heuschrecken gefunden worden, welliche greülichen gestanckh von sich geben, als man dieselbe zertretten. Was nun diß und anders bedeut, ist allein Gott dem Herrn bekant.
   4] Auf 12. diß seindt die türggen zue Ofen aufrüerisch worden und erstlich daz fueßvolckh zum Arap aaga  (der nasadisten obristen) gangen und ine benötiget, daz er mit inen zum schaz- oder pfennigmaister geen müessen sich zuerkundigen, warumben inen ir bezalung nit gegeben werde, der schazmaister sich jedoch entschuldiget, er nit lang im landt und ime dasselb wesen unbekannt, er seye dem bassa underworffen und nur deß bassa schuldt, daz dem kriegsvolckh daz irig nit geben werde, und eben dise wort gemelter schazmaister vorm bassa erholet, darauf der bassa geantworttet, was er gethon, daz seye gethon, was nun darauf ir fürnemmen, dem mögen sie gleichwol nachkommen. Auf diese deß bassa red haben sie alßbaldt auff ine geschlagen und geworffen und ine biß ins frauenzimmer mit schlagen und werffen vervolgt und umbgebracht, dessen sone (bey 19 jarn allt) haben sie zum fenster hinauß gegen der Thonau geworffen, daz er einen fueß gebrochen, auch alle deß vatters und sons güetter under inen gethailt, hernacher deß schazmaisters 2 fürnemste nidergehauet, volgents auf etliche fürneme heuser gefallen, die darinnen nidergehauen, die güetter genommen und under inen außgethailt und Ally geschryen, was mit inen nit hallten wöllen, nidergehauen, sollen willens gewest sein, gar auf Gran heraufzurucken und sonderlich den Rarchman aaga haimzusuechen.
   5] Die ursachen solliches tumults sollten sein, gedachter bassa etlichen haimliche audientiam geben, die kriegsleüth nit bezalt und das korn, auch brot allenthalben aufkauffen und den underthonen, auch kriegsleüthen umb toppelt gellt widerumb geben lassen.