Cod. 8963 - 819r

Auß Praag von 27. November anno 90
   1] Die Kay(serliche) Ma(jestä)t etc. haben anfanng gemacht, den brandenburgischen, bayrischen unnd florentinischen gesandten (so vor etlichen tagen alhie ankhommen seindt) audienz zuegeben, aber seit vorgesteren (von wegen eines bekhomnen catarri) sich widerumb inn irem zymmer innen gehalten.
   2] Der bischoff von Preßlau ist inn der Kay(serlichen) Ma(jestä)t etc. namen alberaith nach dem polnischen lanndtag verruckht, dessen bevelch ist umb cassation anzuehalten deren hiebevor geschöpffter decreten wider das hochlobliche hauß Össterreich, dann auch bey konig Sigismundus inn verthrautem gehaimb zue solicitieren, waver derselb auß dem lanndt Pollen zuestöllen gesynnet, daß er einen herren von Össterreich etc. an sein statt befürdern welle.
   3] Von wegen der grossen teurung und hungersnott, so hie zue lanndt regiert, hat sich ein grosse anzaal baurschafft enndtböret, die ziechen mit starckhen hauffen uf dem lanndt herumb, belegern die reychen schlösser unnd lanndtheusser, damit sie gelt bekhommen, hierauf haben die Kay(serliche) Ma(jestä)t etc. schon etliche bevelch publiciern lassen, daß man zue gegenwöhr wider bemelte aufrierische bauren greiffen und auf sie strayffen solle.
   4] Wir haben alhie zeitung, obwolen der herzog von Parma daß stättlin Corbell inn Franckhreich am sybenden sturm erobert mit nit kleinem verlurst seines volckhs, seye doch gemeltes stättlen hernacher bald widerumb von den navarrischen eingenommen worden unnd die spanyschen grossen schaden gelitten.