Cod. 8964 - 163r

Auß Wienn von 26. Oktober anno 91
Über jüngst würdet durch ein anders, des haubtmans Großweynns schreiben, der schaden im Wündischlanndt unnd daß die türggen bey 20 dörffer geblindert und verhört haben, daß auch der bassa von Bosen im abzug nüt wenig geklopfft worden, mit particularitets confirmiert. unnd da der unseren hinderhalt nit zue baldt ausgesprenngt, sonnderen was wenigs hinderhalten wären, die türggen gleich mütten unnder sie khommen, unnd mit irem höchsten schaden geschlagen worden, gleich wol ohne das geschechen, der türggen etlich unnd 60 gefanngen, 250 köpff, 112 roß, 20 fahnen, vil zuerhawen hörtrumell, item 5 stuckh geschütz aud rödern, welliche gleich wol durch die türggen inn die wäldt vergraben, durch die unnseren gefunden, unnd also neben noch einem falckhenet, so der bassa unnder eroberung aines haus (so dem Herren Tohi zuegehörig) bekhommen, inen den türggen abgedrungen und alles nach haus gebracht worden.
Heut dato umb 3 unnd 4 uhren morgens hat man alhie den hymmell ganz bluet roth gesehen, welliches meniglich ganz erschrockhenlich gewest.
Sonsten bey jungst abgeraister pottschafft nach Türggey ist ir predicant, wellicher ein cathollischer priesster gewesen, zue Ofen zu einem Mammoluckhen unnd türggen worden. Der mechte mit der zeyt seinen lohn bekhommen.
So will es mit dem erdbüdem noch nit gar außsezen, Gott verhiet könnfftig übell.