Cod. 8958 - 201r

Aus Prag von 7. Mayo
   1] Vorgestern kombt meines herren diener curier weiß von der Kay(serlichen) M(ajestä)t etc. geschickt mit der wider antwortt von Insprugg zue rugg, der bringt, das Ir D(urchlauch)t entlich entschlossen, auf 15. diß von Insprugg aufzubrechen unnd auf den actum der guldin flüß alhero zueraysen, dieweil aber ertzhertzog Carol berait zue Laxenburg im warmen badt mit dero gemahl, unnd sobalt als bis auf den lesten diß die sachen alhie beschechen soll, nit fertig werden könden, ist gestern aber ein curier von hir nach Insprugg mit Irer Kay(serlichen) M(ajestä)t etc. aignen handtschreiben, sowol ainer zue ertzhertzog Carolo gehn Laxenburg abgefertiget worden, die vermuettung, hochgedachter actus werde sich noch fortt bis pfingsten verschieben.
   2] In dieser stundt bekom ich schreiben von Wien, wie das den 4. diß die F(ürstliche) D(urchlauch)t etc. ertzhertzog Maximilian den orden von den ordens herren als großmaister zue Mergenthaim in Franckhen eingeantwort unnd angenomen, solche empfängnus auch gar stattlich bei den augustiner ungefahrlich zwischen 10 und 11 uhrn mittags beschechen seye, bey welchem sich auch ertzhertzog Caroll sambt dero gemahel (dieweil Laxenburg nit weit von Wien, da Ir D[urchlauch]t etc. baden) befunden, welche ordens herren gar stattlich getractiert unnd costfrey gehalten worden.