Cod. 8958 - 203r-203v

Der Röm(isch) Khay(serliche) M(ajestä)t etc. beandtworttung auf obermelts schreiben
   1] Die Röm(isch) Khay(serliche) auch zue Hungern und Beham Khün(igliche) Ma(jestä)t etc., unser allergnedigister herr haben nach genediger anhörung deren werbung und mündtlichen fürtrag, so des durchleichtigen großmechtigen fürsten und herrn, herrn Teodori Ivanovitz, herscher aller reüssen und großfürst in der Moscau etc. abgesandter Lukhian Novoscelcaw neulicher tagen gethon, erstgedachtes großfürst schreiben, welches er der gesandt daneben uberraicht, verdolmetschen und Ir Ma(jestä)t etc. inhalt verlesen lassen, und dieweil sie darauß vernemen des bemeldten großfürst nach tödtlichem abgang seines vatters zu regierung gelangt, so thon Ir Khay(serliche) Ma(jestä)t etc. ime darzue von dem Allmechtigen allen segen und wolfart winschen, sich auch dabey das freundtlichen und brüederlichen zuempiettenns freundtlich bedannckht, und seindt nit weniger genaigt und erpiettig, gedachten großfürsten hinwider allen nachparlichen und brüederlichen wille, alß bey waillant erstgemelt seines vattern seligen lebzeitten auch geschehen, zuerzaigen, wie Ir Ma(jestä)t etc. auch nit underlassen wellen, auf die begerte hineinschickhung in die Moscau khünfftigkhlich und wann es mit gelegenheyt würdet sein khenden, bedacht zuesein.
   2] Sovil den fürders die freye handtierung, davon in der werbung wie auch in des großfürsten schreiben meldung beschieht, anlangt, da wissen sy Ir Khay(serliche) Ma(jestä)t etc. nit zuerindern, das jemandt biß daher mit zuelassung unverdechtigen wöhren zue handtieren von Ir Ma(jestä)t etc. gespert oder verpotten worden, cderhalben Ir Mat. sich disfals gegen dem großfürsten in irem anndtwortschreiben, welchesc dann herrn abgesandten neben seinem khaiserlichen postbrief auß der khayserlichen hofcanzley zuegestelt werden, soll also erclaren, das er (Ir Ma[jestä]t etc.) versehenns damit wol zufriden sein wirdt, unnd dieweil leztlich Ir Khay(serliche) Ma(jestä)t etc. auch in solchem schreiben für etliche Irer Ma(jestä)t etc. diener und andern teütsche person, so in der Moscau gefangen gehalten worden, intercedieren und ire erledigung suechen, alß begern Ir Khay(serliche) Ma(jestä)t etc., der herr abgesandt welle ime denselben puncten auch am pesten angelegen sein lassen unnd zue seiner anhaimbs khunfft bestes vleiß bey seinem herrn befürdern helfen, damit dieselbigen gefangenen irer beschwerlichen behafftung widerumb erledigt und unaufgehalten zu den ieren gelassen werden, daz begern Ir Khay(serliche) Ma(jestä)t etc. gegen den abgesandten in gnaden, damit sy ime wol gewogen zuebekhomen, unnd haben ime diß alles uf obbemelte seiner werbung in antworth anzuzaigen bevolchen.
Datum Prag under Ir Khay(serlichen) Ma(jestä)t etc. aufgetruckhtem insigl, den 26. tag Aprillis anno 85.
   3] Verzaichnus, was dem podtschaffter für sein person verehrt worden:
Erstlichen ein silbergeschier 600 fl
Ain stueckh rotten flor(en)t(inischen) atlaß per 214 fl 30 kr
Ain stuckh cor gebluembten damaschk 96 fl
Ain stuckh gelb gebluembten damaschk per 80 fl
Ain stuckh ploben damaschk per 40 fl
Ain stuckh schwarz samat per 162 fl
Suma thuet 1192 fl 30 kr
Diennern:
Den 2 fürnembsten dienern sambt dem dolmetschen 156 fl 40 kr
Den andern underschiedlichen als 7 stalldienern 83 fl 20 kr
Suma sumarum 1432 fl 30 kr