Cod. 8960 - 24r

Auß Praag von 22. Januari
   1] Göstern sein die F(ürstliche) D(urchlauch)t erzherzog Maximilian zue Österreich mit ain 26 personen alher kommen, was der intent, wais man aigentlich nit, zweifels ohne würdet es umb Pollen zue thuen sein.
   2] So sein gesteren sechsische gesanndten alher kommen, der graf von Barby, Eilenbeckh doctor unnd Abraham Bockh, das ist ain anzeigung, das der churfürst, als man gesegt, villeicht nit selbst kombt.
   3] Sonnst geth die sag, die F(ürstliche) D(urchlauch)t erzherzog Mathis seyen auf den pollnischen granizen ankommen, in etliche wellen außgeben, hochstgedachte F(ürstliche) D(urchlauch)t befinden sich albereith im schloß zue Cracau, yedoch melde ich solliches allain wie der gemain ruef geth unnd nit mit grundt.