Erwähnte Orte
Erwähnte Personen
Titel | Funktion | Identifizierung | Erwähnungen insgesamt |
---|---|---|---|
Kielman von Kielmansegg, Andreas | Militär |
13
|
Transkript
Auß Wienn von 17. ditto
1] Bey unnß alhie wenig neues, allein schreibt man auß Thürnen inn Hungern, daß der türckh alberaidt 2 bergstätt, Altensol unnd noch ein anndere, eingenomen, dieselben inn grundt verdörbt, daß arme volckh alles miteinander hinweckh gefüert, Löbens ist noch vom feynndt nit eingenomen, halten sich vösst, brauchten aber wol hilff, wie dann herr Andree Kielman im anzugkh, dem an volckh nit mannglet, allein waß lanngsam zuegeeth, unnder desßen verhörgt unnd verdörbt der feyndt daß lanndt mit rauben unnd prennen aufs hefftigest, unnd ist man inn Unngeren allenthalben auff. Gott der Herr wölle dem bluett hunndt sein fürnemen steueren unnd whören, die vösstung Löbens wie auch anndere gnedigklich behüetten, dann wir den feynndt inn tag unnd nacht mit ganntzer maacht vor Wienn zue besorgen haben.
2] Alhie bey unnß befünndet sich über die massen sehr viel ungezüfer alß von meißen, sonnderlich unnderhalb gegen Hunngeren, die thuen allenthalben inn weingärten und velderen grossen schaden, also da einer verhofft, 50 aymer zue haben, khaumb 25 darvon bringt, umb daß sie alles außfressen, dessen sich zue verwundern, und daß neue geseete getraydt alberaidt verdörbt, daß zuerbarmen.
3] Man hat in der freystatt, 6 meil von Wienn gelegen, 2 alte weiber sambt einem bauren gefangen, die sollen durch ire zauberey solch schädlich ungezifer ins landt khomen machen, waß man der halben mit solchen leüthen fürnemen würdt, kann man derzeit nit wüssen.