Cod. 8962 - 139r-140r

Auß Praag von 14. Marty anno 89
   1] Deß frydens conditiones , so zwischen der Kay(serlichen) May(estä)t unnd Polln beschlossen worden:
1. Alles, so ain zeitheer zwischen inen und den irigen feynndtlichs fürgelauffen, solle zue ewigen zeytten vergessen, tod unnd ab sein.
2. Item zwischen inen ein ewiger fryden geschworen, den Polln Lybliano restituiert werden.
3. Unnd heergegen archidux Maximilianus auf freyen fueß der gestaldt gelassen werden, ut abstineat a titulo regio et perpetuam pacem cum regno colat.
4. Fehrner solle der könig von Polln aufs eheist zue Irer May(estä)t ein pottschafft schickhen rogatum ut mayestas sua praeteritas offenssiones tranquillitatem publicam condonare velit, solche formalia verba steheen im recess.
5. Heernacher werden Ir May(estä)t zue ihnen gleichsfalß schickhen, unnd inen ire freundtschafft offrehieren lassen.
6. Wie auch der könig persohnlich archiducem Maximilianum unnd seiner D(u)r(chlauc)ht deßgleichen alle freundtschafft erbietten.
7. Die altte foedera unnd compacta sollen inn optima forma renoviert unnd bestättiget werden.
   2] Obgleichwoln vorstehendts alles auf der Kay(serlichen) May(estä)t ratification gestöllt worden, solle es doch syder auf 6. dito von Irer May(estä)t ratificiert sein, daß also mann darauff Irer May(estä)t Maximiliani baldt hieheer gewärtig, wie dann der herr von Rosenberg sambt den andern der Kay(serlichen) May(estä)t commissarien alberaydt ans heerauß ziechen auß Polln sich befynnden.
   3] Darneben geeth die sag, Maximilianus solle den titul alß erwölter könig inn Polln gebrauchen mögen.
   4] So unnd wann auch die hungern daß graenitzhauß Lybelau sambt der zuegehör je innen wollten behalten, sollen sye der cron Polln 100 000 taler darfür bezalen unnd erlegen.
   5] Die sag geeth auch, die Kay(serliche) May(estä)t werden baldt nach osteren auf Dresden zum churfürssten von Sachssen raysen, oder aber Ire Churf(ürstlichen) G(naden) etc. zue der Kay(serlichen) May(estä)t hieheer khommen.
   6] Biß inn 16 fürsstliche abgesanndten auß dem reich befinden sich alhie, waß aber dero enndtliche wörbung, ist inn gemeyn noch nit offenbar, jedoch die vermuethung, es seye mayst thaylß zuethun weegen der capitular herrn im bruederhof zue Strassburg.