Cod. 8962 - 141r-141v

Auß Prag von 15. Marty anno 89
   1] Zue continuierung gueter correspondentz soll ich dem herrn nit verhallten, das nun einmal die pollnische hanndlung (dem Allmechtigen sei lob unnd dannckh) zue einer gueten vergleichung, darzue doch viel wie gleichfalß der herr kleine hoffnung gehabt, gerathen, mit waß conditionibus khan man noch nit wissen, allain das die expensen uhnd schäden, so hinc inde beschehen, compensiert unnd Ir D(urchlauch)t Maximillianus der gefengkhnuß enndtlediget unnd ein ewiger friden zwischen beeden khönigreichen Behaimb unnd Pollen zuegesagt, die anndere conditiones ist man zue deß herrn von Rosenbergs ankhonfft, die man teglich erwartet, zuvernemen gewertig.
   2] Eß haben etliche protestantische stätt und fürsten deß reichs, so sich die evangelische nennen, ire gesandten, deren 18 zuesamen alheer abgefertiget, so vor sechs tagen ankhommen, was ir anlanngen, hab ich bißhero nit wissen khünnen, dann sye bei Ir Khay(serliche) Ma(jestä)t etc. noch khain audientz gehabt auß ursachen, da sich dieselb propter catharum ein zeitlang innen gehallten und noch.
   3] Eß würdt den herrn villeicht wunder nehmen, das der herr Breyner mit sovil posten zu Ithallia gezogen, aber es soll der herr wissen, das er von Irer Khay(serlichen) Ma(jestä)t etc. wegen der grafen Novollara, die der herzog von Mantua nemlich spoliert unnd irer güetter priniert, widerumb in ir allte posession zuesezen abgefertiget.